Основачот на апликацијата Телеграм, Павел Дуров е обвинет за серија кривични дела поврзани со недозволени активности на неговата апликација и доби забрана да ја напушти Франција, во редок чин на француските власти да бараат одговорност од него лично за однесувањето на корисниците на Телеграм, објави Њујорк Тајмс.

Триесет и деветгодишниот Дуров беше задржан во саботата поради истрага за наводна несоработка на Телеграм со органите на прогонот во случаи каде корисниците на апликацијата вршат кривични дела.

Телеграм е користен во бројни кривични случаи врзани за сексуална злоупотреба на деца, трговија со дрога, злосторства од омраза, но речиси и да не соработувале со француските обвинители кога тие од нив барале соработка.

Кауцијата на Дуров од 5 милиони евра е платена и тој е пуштен, но мора да се пријавува во полициска станица двапати неделно.

Апликацијата Телеграм што Дуров ја основаше во 2013 година, сега има над 900 милиони корисници. Тој има руско државјанство но ја напушти Русија во 2014 година и се пресели во Дубаи, Обединети Арапски Емирати. Дуров исто така има државјанство на Франција и државјанство на Обединетите Арапски Емирати.

Телеграм долго време е на радарот на органите на прогонот поради тоа што терористички организации, продавачи на дрога, трговци со оружје и крајно десничарски групи го користат за комуникација, регрутација и организирање.