Шапка со двојни рогови за која се верува дека му припаѓала на Наполеон Бонапарта е продадена за рекордни 1,9 милиони евра на аукција од париската аукциска куќа „Друо“, пишува „Гардијан“.

„Првично, цената на шапката беше проценета на 600.000 до 800.000 евра, но на крајот ја надмина цената од 1.884.000 евра, која беше платена за една капа на Наполеон во 2014 година“, изјави аукционерот Жан-Пјер Осенат.

Наполеон бил фасциниран од шапката и таа станала составен дел од неговиот имиџ, со кој се истакнувал на бојното поле.

Тој носел капи со двојни рогови, кои биле исклучително популарни во 18 век, првично дизајнирани за потребите на јавачите. Иако овој тип капи се носеле со едниот рог свртен напред, а другиот наназад, Наполеон ги носел на поинаков начин, со роговите насочени настрана.

Се проценува дека Наполеон поседувал 120 капи со два рога за време на неговото владеење. Сите биле направени од истиот производител „Poupart&Cie“ и сите биле направени од ист материјал, скап црн филц.