Само 25 илјади денари плата добиваат службениците на шалтерите во Фондот за здравство (ФЗОМ), исто како и оние што работат во канцелариите во подрачните единици и што ги одобруваат боледувањата, исплатите на породилно отсуство или рефундациите на лековите.

Во тесни канцеларии, со стари и бавни компјутери, низ рацете на еден деградиран службеник на Фондот дневно поминуваат и по 40 предмети на странки. Работат со најсиромашните, со болните и со оние што се социјално загрозени. Велат дека на медиумите ќе им испратат фотографии од печурки што растат во некои подрачни канцеларии со мувла. Во скопската подрачна единица пак, сведок за една чудна ситуација се десетиците инвалидски колички кои пет години нема кој да ги отстрани од задната страна на зградата и да ги донира во државните болници. Како што осигурениците ги враќаат во Фондот, така количките се трупаат и ја нагрдуваат и онака старата зграда.

Но, заедничко за сите овие службеници е што и самите се чувствуваат деградирани и далеку полошо третирани од оние што работат во раководството на Фондот. Одамна не земаат ниту додаток за храна и превоз, а сега се дојдени до нивото да се закануваат со штрајк за покачувањето од само 2.400 денари кое им е доведено под знак прашање.

Денеска вработените од Фондот почнаа предупредувачки протест. Меѓу насобраните незадоволни службеници кои протестираа проструи информацијата дека членовите на Управниот одбор на Фондот месечно земаат 200 евра хонорар. Тие прашуваат за што членовите на Управниот одбор ги земаат овие хонорари од по 200 евра, ако самите со своите гласови оневозможуваат платите на другите вработени колеги во Фондот да бидат усогласени со минималната плата. Бараат да се донесе одлука за тоа колкав ќе биде бодот за платите од 1 јуни. Второто нивно барање е Управниот одбор да биде разрешен во целост. Ако до први јуни платите не им се усогласени со минималните, ќе стапат во генерален штрајк и здравствените осигуреници нема да добиваат услуги. Тоа ги вклучува надоместоците за боледување, за породилно отсуство, рефундации за лекови, плати за здравствениот сектор и за матичните лекари и многу други круцијални услуги.

– Се наоѓаме во цајтнот. Сакаме да го предупредиме Управниот одбор да седне, да си ја сработи работата, да си ги донесе одлуките и повеќе да не не држи во неизвесност. Бидејќи самиот Управен одбор најавил дека нема намера до формирањето влада да донесе никаква одлука за нас, останува прашањето зошто постојат. Би било поетички да си дадат оставка и на нивно место да дојдат луѓе што ќе си ги заработат парите. Ако до 15 мај не се донесе одлука за усогласување на минималната плата, секој ден од 15 мај натаму, ќе имаме прекин на работата во сите подрачни единици во сите градови во времетраење од еден до два часа. Од сега најавуваме дека ако нашето прашање не е решено на 1 јуни, ќе стапиме во генерален штрајк, изјави претседателот на синдикалната организација на Фондот за здравство, Бранко Аџигогов.

Управниот одбор на Фондот за здравство има седум членови. Двајца од нив се повереници на државата од Министерството за финансии и од Министерството за здравство, со годишно ротирање. Сите други се претставници на Лекарската комора, Сојузот на синдикати, Здружението на пензионери и на Организацијата на потрошувачи.

– Од тие седум лица, предивидено е само едно лице да биде пензионер, но во моментов три лица се пензионери. Едноставно, нарушен е духот на Законот за здравствено осигурување, односно функционирањето на Управниот одбор. Немаме ништо против тие лица, ама законодавецот многу одамна предвидел каква треба да биде застапеноста на интересните групи во Одборот, и тоа не треба да се прекршува. Државниот повереник на Министерството за здравство не е претставник на Министерството, туку е назначен од Клиника. Тој има етички конфликт, бидејќи ќе треба да си носи одлуки за неговата плата и за неговиот буџет на матичната клиника каде што работи, додаде Аџигогов. 

Синдикалната организација на Фондот за здравство е втората најголема синдикална организација во државната управа и има над 500 членови. На денешниот протест дел од нив рекоа дека на државата не ѝ се важни вработените во ФЗОМ.

– Бараме само 2.392 денари по лице. Тоа е капка во морето. Можеби некој ќе праша за што се буниме кога се работи за малку пари но тоа е законска обврска за сите. После 31 мај ние не знаеме колкав ќе биде бодот за нашата плата и не знаеме за колку пари ќе работиме, посочи Аџигогов.

Претседателот на Синдикатот на УПОЗ Трпе Деаноски на протестот ја повика Владата и техничкиот премиер Талат Џафери да не дозволат ФЗОМ да ги затвори вратите.

– Ја повикувам Владата на чело со Талат Џафери, раководството на Фонд за здравство, а и овој Управен одбор, додека не го разрешат, да си го загреат столчето. Видоа што се случи во февруари кога Фондот за здравство штрајкуваше само два дена. Ги повикувам сите одговорни да не дозволиме овие вработени зад нас да ги затворат вратите бидејќи ако ги затворат вратите ќе патат само граѓаните на Република Македонија. Знаете какви услуги се даваат од Фондот за здравствено осигурување на Македонија. Помагаме и работиме за најлошите случаи во државата. Апелирам до сите надлежни, не бараме ништо, бараме да ни останат платите исти како што се сегашните и бараме усогласување со пораст на минимална плата од 2.400 денари. Ако тоа е проблем за 800 вработени, што правиме понатаму, рече Деаноски.