Фудбалерите на Шкендија отпатуваа за Ереван каде што в четврток (17.00 часот) ќе го игра реванш натпреварот од првото квалификациско коло во Лигата на конференции против ерменскиот Арарат.

Потсетување дека тетовските „црвено-црни“ на првиот меч во Скопје триумфираа со резултат 2:0 и се поблиску до пласман во следната рунда.

Тренерот на Шкендија, Артим Шаќири вели дека ништо не е готово и дека ќе се даде максимумот и на возвратната пресметка да се оствари целта.

– Задоволни сме од резултатот во првиот натпревар, нè чекаат уште 90 минути во Ерменија, таму ќе играме за да се пласираме во следната рунда. Среќата е потребна и во фудбалот, а среќата беше на наша страна. На дуелот во Скопје нашите играчи добро блокираа, но и голманот беше одличен. Ќе се трудиме да бидеме подобри, и секако грешките кои се направени да не се повторат во иднина – вели Шаќири.

Главен судија на мечот во Ереван ќе биде Олексиј Деревински од Украина.

Потсетување дека победникот од овој двомеч во второто квалификациско коло ќе игра против Валмиера од Летонија.