Во Спортскиот центар „Јане Сандански“ – Скопје од 19.00 часот денеска ни гостува репрезентацијата на Црна Гора, а натпреварот е затворен за јавноста.

Машката сениорска селекција на Македонија вечерва ќе го одигра првиот (од двата предвидени) пријателски мечеви против Црногорците.

Ова ќе биде првата можност за стручниот штаб, предводен од селекторот Драган Бајиќ, да ја провери моменталната форма на „црвено-жолтите“ пред почетокот на претквалификациските дуели (12-18 август) против Швајцарија и Словачка.

Инаку, за овој натпревар Бајиќ се реши да им даде шанса на вкупно 15 кошаркари. Своите минути во националниот дрес на овaа проверка ќе ја чекаат: Андреј Магдевски, Кристијан Николов, Бојан Крстевски, Адем Мекиќ, Бојан Трајковски, Бобан Стајиќ, Горјан Марковски, Дамјан Робев, Виктор Ефремовски, Марко Миловановиќ, Андреј Андоноски, Теодор Симиќ, Лејсон Зекири, Валмир Какруки и Џејкоб Вајли.

За два дена, на 4 август, од 19.00 часот, двете селекции ќе одиграат уште еден контролен меч, исто така во СЦ „Јане Сандански“.

Во изменет состав ќе игра и нашиот денешен ривал, црногорскиот стратег Борко Радовиќ во составот ќе ги нема едни од најдобрите свои играчи (доколку не се земе во предвид Никола Вучевиќ), натурализираниот плејмејкер Џастин Кобс (Будуќност Подгорица), како и еден од најдобрите крилни центри во европската кошарка, Бојан Дубљевиќ (Валенсија).