Марјан Секуловски во вториот дел од сезоната ќе биде тренер на фудбалскиот клуб Пелистер, кој е моментно последнорангиран на табелата во Првата македонска лига.

Секуловски досега ја водеше екипата на штипска Брегалница која пак се наоѓа на четвртото место во шампионатот.

И претходно има веќе соработувано со битолчани, а во тренерската кариера беше и на клупата на Силекс, 11 Октомври, Новаци, Ајејавади јунајтед, Македонија ЃП, Јангон јунајтед, Мазија и Шан јунајтед.

Претходно Општина Битола ја информираше јавноста дека се исплатени финансиските долгови на ФК Пелистер и дека Ванчо Мицевски е избран за спортски директор.

Пелистер во пролетниот дел од сезоната ќе се обиде да им се врати на победите и обезбеди опстанок во елитата, а има шанса да се закити со трофеј во Купот каде што е полуфиналист.