Повеќето од нас барем еднаш почувствувале необјаснив замор откако разговарале или се сретнале со некого. Тоа не е оној здрав замор од смеење и квалитетно поминато време, туку исцрпувачки. Оние кои со своето однесување, ставовите или начинот на комуникација кај нас предизвикуваат чувство на внатрешен немир, лошо расположение и потреба од социјална детоксикација.

Како да ги препознаете овие луѓе?

Постојат неколку модели на однесување кои бараат поставување јасни граници. Притоа, не е себично да размислувате за сопственото емоционално здравје, кое е клучот за квалитетни односи. Затоа, внимавајте на следниве карактеристики:

Хронични критичари

Без разлика што направиле, овие луѓе секогаш имаат нешто негативно да кажат. Тие не пропуштаат да ги истакнат вашите мани и наместо да бидат конструктивни, нивните критики често се деструктивни, поради што после секоја средба се чувствувате помалку вредни и несигурни.

Вечни песимисти и драматичари

Овие луѓе гледаат на сè негативно. Без оглед на ситуацијата, тие ќе најдат причина да се жалат, да критикуваат или да се грижат. Згора на тоа, воопшто нема да се потрудат да најдат решение, туку ќе останат закопани во проблемот. Нивниот став може да ве вовлече во вител од негативни мисли и да ве натера да се чувствувате безнадежно. Со песимистите се поврзуваат и таканаречените драматичари, чиј проблем е секогаш најголем. Таквите луѓе го бараат вашето постојано внимание и поддршка, но тие ретко прават нешто за да ја променат ситуацијата. Нивниот живот едноставно е драма.

Манипулатори

Манипулаторите ги користат вашите емоции на подмолен начин за да го добијат она што го сакаат. Без разлика дали се работи за чувство на вина, емоционална уцена или претерано ласкање, нивните постапки често имаат задни намери, поради што се чувствувате исцрпени и искористени.

Луѓе склони кон озборувања

Иако на почетокот изгледаат забавно, луѓето кои имаат тенденција да шират озборувања често внесуваат негативна енергија во односите. Освен тоа, запрашајте се ако таков човек озборува други пред вас, тогаш што зборува за вас пред другите? Оние кои озборуваат создаваат атмосфера на недоверба и непотребна драма.

Љубоморни

Иако нема ништо лошо во здравата доза на љубомора, кога таа ќе стане начин на живот, се претвора во проблем. Овие луѓе не можат да се радуваат со вас, на пример поради некое животно достигнување, затоа што чувствуваат љубомора, која често ја изразуваат на многу лош начин. Обидете се да ги држите на дистанца.

Егоцентрични

Овие луѓе секогаш се ставаат себеси во центарот на вниманието. Вашите проблеми, чувства и потреби не им се важни. Разговорите со нив често се еднонасочни, бидејќи тие се исклучиво фокусирани на сопствените интереси.

Оние кои се секогаш во право

Нивните ставови се единствените исправни и немаат проблем да ви ги наметнат. Поради ова, можете да се чувствувате под притисок и емоционално исцрпени во нивна близина. Покрај тоа, нивното долгогодишно задушување може да ја оштети вашата самодоверба и да предизвика стрес, па затоа е важно да поставите јасни граници и да го заштитите сопствениот внатрешен мир.

Ако не можете целосно да се дистанцирате, обидете се да го ограничите времето поминато со такви луѓе и фокусирајте се на оние со кои напредувате, кои ве инспирираат и поддржуваат и кои носат радост во вашиот живот.