Седмото издание на фестивалот на камерна музика „Скупи КамерФест“ во организација на здружението „Муза“ – Скопје, а со уметнички директор Блерим Груби, оваа година ќе се одржи во периодот од 5 до 16 септември во Скопје и Тетово.

Во програмата на фестивалот планирани се пет извонредни концерти со учество на познати изведувачи од повеќе европски земји.

Свеченото отворање на фестивалот ќе се одржи на 5 септември (четврток), од 19 часот, во салата на Филхармонија на Северна Македонија, со концертот насловен „Hungarian String Harmony“. Овој концерт на скопската публика и носи тројца унгарски инструменталисти: Julia Pusker на виолина, Mate Szusc на виола и Balazs Dolfin на виолончело.

На програмата на овој концерт се дела од композиторите E. Dohnányi, Z. Kodály и W.A. Mozart. Влезот на концертот, како и на сите следни концерти на фестивалот, е слободен.