Поранешната државна секретарка во српското Министерство за внатрешни работи, Дијана Хркаловиќ, денеска беше сослушана во Службата за борба против организираниот криминал (СБПОК) по повод наводната поврзаност со криминалците Дарко Елез и Вељко Беливук. Српските медиуми објавија дека таа одби полиграфски тест.

Ова не е прв пат Хркаловиќ да одбие да оди на полиграф.

Таа и во јануари годинава, кога беше испрашувана во врска со аферата со нелегалното прислушување на претседателот на Србија, Александар Вучиќ, членови на неговото семејство и уште неколку високи функционери одби полиграфско тестирање. Според српските медиуми, Хркаловиќ првично прифатила да оди на детектор за лаги, но во последен момент се предомислила.

Аферата „Беливук“ ја тресе Србија: Совет за национално прислушување

Причината за денешното рочиште во СБПОК беа наводните врски со неодамна уапсените криминалци.

Дарко Елез, државјанин и на Србија и на Босна и Херцеговина, претходно беше осуден во Србија, и сега чека конечна одлука за неговата екстрадиција во БиХ. Вељко Беливук, попознат како Веља Невојаа, беше уапсен на 4 февруари под сомнение дека бил организатор на криминална група што извршила најтешки злосторства под покровителство на навивачката група „Принципи“.

Медиумите пишуваат дека истражителите веќе имале обезбедено цврсти докази против поранешната висока полициска функционерка, како и против Славиша Кокеза, претседателот на Фудбалскиот сојуз на Србија, кој исто така наводно одржувал тесни врски со криминалците.

„Информер“, повикувајќи се на извори од истрагата, објави дека на потег е Обвинителството, затоа што полицијата има несоборливи докази дека Хркаловиќ и Кокеза активно соработувале со кланот на Беливук, а двајцата можат да се третираат како „истакнати членови на кланот“, додека Хркаловиќ била „еден од мафијашките босови“.

„Што се однесува на Дијана, таа активно работела заедно со кланот така што им обезбедувала поддршка и информации од полицијата. Хркаловиќ, со помош на неколкумина свои луѓе во полицијата буквално приватизирала еден дел од МВР и му го дала на располагање на Беливук и на црногорскиот ’Кавачки клан‘. Тој одметнат дел од Министерството со Хркаловиќ на чело, толку многу се осилил, што во еден момент си умислиле дека ќе ја преземат и целокупната власт во земјата,“ вели изворот.

(ВИДЕО) Вучиќ прикажа вознемирувачки фотографии од убиствата на Беливук

„За време на истрагата околу злосторите на Вељко Беливук, но и околу прислушувањето на претседателот Александар Вучиќ и членовите на неговото семејство, инспекторите сфатија дека сите патишта водат кон Дијана Хркаловиќ. Испаднало дека бројни налози за криминални активности потекнувале токму од неа. Освен што ја товарат материјални докази, се е поткрепено и со сведочења на неколку нејзини блиски соработници од МВР. Тие сфатиле дека нејзиниот клан во полицијата е разбиен и дека им се заканува повеќегодишен затвор, па одлучиле да раскажат сè што знаат, надевајќи се дека така барем ќе издејствуваат помали казни,“ вели изворот од истрагата за Информер.

Хркаловиќ не демантираше ништо од овие извештаи, а истовремено за својата добра работа напредуваше со вртоглава брзина. Нејзината наводна моќ била толкава што во српската полиција се зборувало дека таа е фактички министерка, додека Небојша Стефановиќ бил на позицијата само формално, пишуваат медиумите. Таа иако има само 27 години почнала да работи во полицијата во Србија во 2014 година, без никакво полициско искуство.