И по три месеци од примената на фиксниот надоместок од 200 денари за пристап до електричната мрежа, граѓаните не можат да ја „сварат“ ова давачка, особено што по добивањето на сметките за струја, се уверија дека тие се зголемени. Пристапот до мрежа стартуваше од 1 јануари годинава, а претседателот на РКЕ, Марко Бислимоски уверуваше дека тоа нема да биде нов трошок, туку дека дотогашната мрежарина ќе се раздели на два дела – фиксен и варијабилен. Пристапот до мрежа се воведе со образложение дека тоа е давачка мотивирано од оние што имаат викендици, или станови кои не ги користат, или многу малку ги користат, а имаат пристап до мрежата во секој момент.

На социјалните мрежи постојано се повторува истото прашање: Зошто има две ставки за мрежарина? Се прошири и онлајн петиција за укинување на ставката пристап на мрежа. Имаше и јавни укажувања дека ЕВН сака да профитира на грбот на граѓаните и од скоро 800 илјади домаќинстава да си наплати дополнителни 2,6 милиони евра.

-Нема никој да заработи повеќе пари од она што го определила РКЕ. Да престанат шпекулациите дека ќе биде екстра давачка и ќе се заработат екстра пари. За сметка на собирањето на овие пари ќе се намали цената за мрежарина – објаснуваше Бислимоски.

Професорот д-р Дејан Трајковски тврди дека „Регулаторната комисија за енергетика ги излажала граѓаните дека со воведувањето на фиксната мрежарина нема да се покачат сметките за електрична енергија“.

„Пред крајот на минатата година РКЕ ја извести јавноста дека од 1 јануари годинава се воведува фиксен дел од мрежарината, чие влијание врз висината на сметките за електрична енергија наводно ќе било компензирано преку намалување на варијабилниот дел од мрежарината. Освен тоа, беа наведени процентуалните зголемувања и намалувања во разни тарифни групи од високата (ВТ1…ВТ4) и ниската тарифа (НТ). Клучниот збор е „процентуални зголемувања“, додека апсолутните зголемувања и новите цени не беа дадени. Со тогаш дадените процентуални зголемувања и намалувања тогаш имав извршено симулации за висината на сметките при разни нивоа на потрошувачка, при што сметките според стариот и новиот модел навистина изгледаа приближно исти. Поточно, при потрошувачка до 470 kВч/месец новиот модел требаше да даде поголеми сметки, а при потрошувачка над 470 kВч/месец новиот модел требаше да даде помали сметки. Но, дојде време на веб сајтот на РКЕ (https://www.erc.org.mk/page.aspx?id=287 ) да ги видиме новите цени, а на крајот на краиштата ги добивме и сметките за електрична енергија, па во прво лице се уверивме колкави се навистина новите цени. Анализите со новите цени покажаа дека сите ние бевме излажани, како мали деца со едно обично усно соопштените“, напишува професорот Трајковски на фејсбук.

Според Трајковски, „вистината е дека РКЕ на мала врата на ЕВН им овозможи нов извор на екстра профит, што претходно не постоел“.

Неговиот колега, професорот Рубин Талески, кој беше предводник на тимот кој работел на реформите со блоковите, го оправда воведувањето на овој пристап до мрежа и рече дека тоа не е дополнителна давачка.

-Досега потрошувачите, корисниците на мрежата плаќаат мрежарина којашто де факто се состои од повеќе делови меѓутоа можеме да кажеме дека имаме фиксен и варијабилен дел. Пристапот на мрежа ќе биде тој фиксен дел. За сметка на тоа ќе се намали варијабилниот дел или делот кој сега само како еден се плаќа, а тоа е трошок или надоместок за дистрибуиран или пренесен киловат-час. Со воведување, ова се приближни бројки, на овој фиксен надоместок варијабилниот надоместок, односно сегашниот надоместок ќе се намали за некаде до 20-ина проценти за домаќинствата и малите потрошувачи од категорија – рече Талески.