Општина Илинден со цел да обезбеди поквалитетни услуги, побезбедна и поздрава вода за пиење на граѓаните како и зголемување на капацитетот на водоснабдувањето, деновиве работи на обнова и модернизација на главната водоводна мрежа на улица 9 во населба Илинден и на улица 532 во Марино, во должина од 600 метри.

Градоначалникот Александар Георгиевски појаснува дека модернизацијата опфаќа замена на старите ПВЦ цевки со нови полиетиленски, поради честите дефекти и загуби на вода на овој дел од водоводната мрежа.

Од Илинден соопштуваат дека обезбедувањето на квалитетна вода за пиење е еден од приоритетите во работењето на локалната самоуправа, така што општината во соработка со општинското јавно претпријатие и во наредниот период ќе продолжи со модернизација и подобрување на водоводниот систем.