СДСМ денеска побара оставка од министерот за внатрешни работи Панче Тошковски и од цело СВР Велес по трагедија во Велес, во која беше убиена млада жена и нејзиниот татко.

Од партијата денеска пред МВР порачаа дека оваа трагедија можела да биде спречена.

„Осуда и одговорност за овој случај не се прашања на политика туку на човечки и етички норми. Жената повеќе пати барала заштита, пријавувала закани, насилство, кражби, според некои медиуми над 70 пати. Полицијата знаела, социјалните служби знаеле, институциите не мрднале со прст. Страшно и болно истовремено. Институциите не успеаја да заштитат живот на една жена и на еден човек. Само поради нивното молчење и непреземање ништо има два згаснати животи.

Ова е порака до сите нас дека системот потфрли. А кога системот не ги штити жените тогаш мора да има одговорност и тој систем мора да се промени од корен“ порачаа од опозициската партија.

Жените во Македонија, како што велат, не смеат да живеат во страв за својот живот и својата безбедност, само затоа што нивните пријави ќе завршат во некоја фиока.

„Ние денес сме тука да кажеме: доста е! Уште колку човечки животи треба да згаснат за Тошковски да понесе одговорност?“ прашаа од СДСМ.

ОЈО за злосторството во Велес: Убиецот не боледувал од душевна болест, бил пресметлив и имал забрана за приближување до жртвата