Трета година во низа најдобрите македонски одбојкари ќе учествуваат во ЦЕВ Златна европска лига. Во претходните две изданија Македонија беше во долниот дел на табелата, но избраниците на Јошко Миленкоски се расположени годинава да ја сменат таквата позиција.

Секако приоритет се евроквалификациските дуели со Грција и Грузија во август каде го „бркаме“ пласманот на четвртиот континентален собир во низа, додека учеството во Златната европска лига е дел од процесот на темпирање на формата за тој двомеч.

Сепак, доколку се укаже шанса нашите репрезентативци нема да ја пропуштат:

– Трета по ред година во Златната европска лига. На кормилото на селекцијата се враќа Јошко Миленкоски што искрено мене ме радува и сигурен сум дека многу значи и за останатите, во оваа сега веќе многу подмладена селекција. Со оглед на тоа дека трета година сме дел од ова натпреварување мислам дека треба повеќе да вложиме и ќе бараме резултат. Што се однесува до квалификациите, тие следуваат потоа. Секако дека преку Златната лига ќе ја темпираме формата и за евро – квалификациите и потоа и таму ќе бараме резултат – вели средниот блокер на репрезентацијата, Филип Савовски.

Репрезентацијата без никакви проблеми и со полна пареа тренира во салата „Парк“ во Струмица. Одбојкарите в петок патуваат за Марибор, Словенија, каде на 24 и 25 мај ќе одиграат два пријателски натпревари против Хрватска.