Селекторот Горан Самарџиев е задоволен како неговите избраници го поминаа првиот дел од подготовките на кошаркарската репрезентација на Македонија „Под 20“ години. Зад нив е едно неколкудневно гостување во Романија, каде младинската селекција одигра три пријателски натпревари, два против соодветната селекција на Романците и уште еден против нивната селекција „Под 18“ години.

– Задоволен сум од досегашното залагање на момците, бидејќи, и тоа како, се борат за место во тимот. Засега имаме навистина добра атмосфера, и секој ден гледаме да напредуваме уште повеќе како репрезентација, без разлика на тоа што овие момци немаат, ама скоро никакво, прволигашко искуство – се зборовите на Самарџиев.

Следуваат уште два контролни натпревари, против младинската репрезентација на Косово.

– Ќе дадеме максимум на секој тренинг и контролните мечеви кои следуваат, со цел да се подготвиме што е можно подобро за Европското првенство во Ерменија. Секој од нас мора да даде 110% од своите можности за репрезентацијата и за Македонија – вели Самарџиев.

Согласно со планираните активности, веќе во среда, во Скопје, поточно во салата на СРЦ „Кале“ (од 17.00 часот) ќе гостуваат младинците на Косово. А два дена подоцна, во петок, предвидено е гостувањето во Качаник, каде двете репрезентации ќе го одиграат и вториот пријателскки натпревар во средишниот дел од подготовките за настап на ЕП од Дивизијата „Б“ во Ереван.