Соединетите Американски Држави ги поништија и ги одбија постојните визи на членовите на Палестинската ослободителна организација (ПЛО) и на Палестинската самоуправа (ПА) пред Генералното собрание на Обединетите нации во септември, соопшти Стејт департментот.

Ограничувањето веројатно ќе го спречи палестинскиот претседател Махмуд Абас да отпатува во Њујорк за да се обрати на годишниот собир, како што тоа традиционално го прави, пишува Ал Џезира.

Американската администрација наведува дека одлуката е во „национален безбедносен интерес“ и дека ПЛО и ПА мора да покажат дека го осудуваат тероризмот и го прекинуваат поттикнувањето тероризам во образованието, како и да се воздржат од обиди за еднострано признавање на Палестина или правни кампањи преку меѓународните судови,

Стејт департментот, исто така, нагласува дека ПА е одговорна за тешкотиите во ослободувањето на заложниците во Газа и дека нејзините постапки го отежнуваат процесот на примирје.

Одлуката на САД следува по санкциите воведени во јули врз претставници на ПА и ПЛО, откако неколку западни земји, вклучувајќи ја и Франција, почнаа да размислуваат за признавање на државата Палестина. Американската администрација ја донесе одлуката пред Генералното собрание на ОН, на кое претседателот Доналд Трамп ќе се обрати на 23 септември.

Израелскиот министер за надворешни работи, Гидеон Саар, ја поздрави одлуката и се заблагодари на американскиот државен секретар Марк Рубио, истакнувајќи дека ПЛО и ПА се одговорни „за наградување на тероризмот и поттикнување војна против Израел“. Саар додаде дека со овој чекор администрацијата на Трамп повторно застана на страната на Израел.

Иако израелски медиуми наведуваат дека ограничувањето на визите го крши учеството на светските лидери во Генералното собрание на ОН, од Стејт департментот истакнуваат дека делегацијата на Палестина, која веќе е во Њујорк, ќе има дозвола да присуствува на сесиите.