Заедничката декларација на крајот од самитот ЕУ-САД што се одржа во Вашингтон ја потврдува заедничката посветеност на стабилноста на Западен Балкан и поддршката за европската перспектива на регионот.

„Сите партнери треба да продолжат со реформите кои се потребни за напредок на нивниот европски пат“, се наведува во завршниот документ на крајот од средбата меѓу лидерите на ЕУ и американскиот претседател Џо Бајден, пренесува РСЕ.

Посебен став во заедничката декларација се однесува на процесот на нормализација на односите меѓу Србија и Косово.

„Ја нагласуваме потребата Косово и Србија итно да ги деескалираат тензиите и брзо и безусловно да спроведат договор на патот кон нормализирање на нивните односи и враќање на дијалогот со поддршка на ЕУ“, се вели во декларацијата.