Обидот на американскиот претседател Џо Бајден да најде заеднички јазик со кинескиот претседател Си Џинпинг и рускиот претседател Владимир Путин во врска со војната во Украина ќе биде клучна тема на разговор оваа недела кога Бајден ќе отпатува во Брисел на разговори со европските лидери.

САД и нивните сојузници ќе разговараат за обезбедување оружје и хуманитарна помош за Украина и за украинската бегалска криза на вонредниот самит на НАТО, на состанокот на Г7 и на самитот на Европскиот совет во четврток, пишува Ројтерс.

Но, по неговите неубедливи разговори со кинескиот претседател Си Џинпинг во петокот, Бајден, исто така, планира заедно со европските лидери да го координира одговорот на Пекинг доколку тој обезбеди материјална поддршка за руската инвазија на Украина, велат претставници на американската администрација.

„Претседателот Бајден за време на неговата посета на Брисел ќе се координира со нашите партнери од ЕУ за сите аспекти на нашиот одговор на неиспровоцираната и неоправдана војна на претседателот Путин против Украина, а тоа ја вклучува и загриженоста што ја споделуваме со ЕУ доколку Кина ѝ даде материјална поддршка на Русија“. изјави висок претставник на администрацијата на Бајден.

Успехот на блиската координација за економските санкции, контролата на извозот и трговските мерки наметнати на Русија ги зближија Европа и САД, изјави друг висок американски функционер. Овие демократски лидери имаат зголемена загриженост за потенцијалната улога на Кина во конфликтот.

„Предизвиците со кои се соочуваме се исти со кои се соочуваат Европејците. И затоа, навистина мислам дека има причина за загриженост и кај нас“, рече официјалниот претставник.

Европските земји и Соединетите Американски Држави работат зад сцената со недели за да се обидат да ги убедат кинеските власти да не ја поддржуваат инвазијата на Путин врз Украина, која Москва ја нарекува „специјална операција“ и да го принудат Путин да стави прекин на огнот. Во војната загинаа стотици цивили, уништени се градови и раселени се милиони Украинци.

Кинескиот амбасадор во Соединетите Држави, Чин Ганг, во неделата изјави за Си-Би-Ес дека Кина не испраќа оружје или финансиска помош за Русија. Сепак, тој и другите кинески претставници јавно го отфрлија притисокот за промена на курсот, тврдејќи дека Кина е на вистинската страна на историјата.

Некои дипломати и аналитичари гледаат знаци дека Пекинг се менува. Неодамнешните изјави од Пекинг повикаа на прекин на огнот и ја нагласија цената на војната за глобалната економија, забележа еден европски функционер.

Во годината откако Бајден ја презеде функцијата, Си не покажа знаци на потпирање на различните барања на САД и ги користи поблиските врски со Русија како противтежа против притисоците што Западот ги врши врз Кина.

Си ги отфрли истрагите за потеклото на коронавирусот во Вухан, Кина, во 2019 година. Тој одби да изврши притисок врз Северна Кореја да ја заузда својата програма за нуклеарно оружје и ги отфрли критиките за кинескиот третман на Ујгурите во Ксинџијанг. Тој ги подигна тензиите со Тајван и ја продолжи потрагата да доминира во Јужното Кинеско Море.

Сепак, блиските економски врски на Кина со Г7, кои купуваат околу една третина од нејзиниот извоз, би можеле да обезбедат потпора во обидот да се оддалечи Си од Путин.