САД денеска го потврдија продолжувањето на петгодишниот договор за контрола на нуклеарно оружје Нов СТАРТ, што Русија веќе го потпиша, соопшти американскиот државен секретар Ентони Блинкен.

– Американскиот претседател Џо Бајден вети дека ќе го заштити американскиот народ од нуклеарни закани со повторно воспоставување на лидерството на САД во контролата и неширење на оружјето, се додава во соопштението.

Рускиот претседател Владимир Путин на 29 јануари потпиша продолжување на тој договор.

– САД денеска го прават првиот чекор во исполнувањето на тоа ветување со продолжување на договорот Нов СТАРТ со Руската Федерација за пет години, изјави Блинкен.

Нов СТАРТ истекуваше на 5 февруари. По стапувањето на функцијата на 20 јануари, Бајден предложи продолжување на договорот за пет години, што Кремљ веднаш го поздрави.

Според договорот Нов СТАРТ потпишан во 2010 година од тогашните претседатели на САД и Русија, Барак Обама и Дмитриј Медведев, на двете страни им е дозволено да имаат максимум 1.550 распоредени нуклеарни боеви глави и 700 распоредени ракети и бомбардери, кои се проверуваат со инспекции.

Нов СТАРТ е единствениот преостанат договор за контрола на нуклеарното вооружување меѓу САД и Русија, откако прво САД и потоа Русија се повлекоа од Договорот за нуклеарни сили со среден дострел (INF) од 1987 година.