Денес, руското судство нареди суспендирање на активностите на организациите поврзани со Алексеј Навални, со закана дека ќе бидат прогласени за „екстремистички“, изјави еден од главните соработници на руската опозиција.

„Активностите на канцелариите на Навални и Фондот за борба против корупција (ФБК) веднаш беа суспендирани“, напиша директорот на ФБК Иван Жданов на Твитер и објави фотографии од одлуката со која се заканува целосно забрана за работа на тие организации.

Если вам кажется, что это решение про ФБК – вам кажется. Сегодня началось возможно главное судилище этого года. Признание борьбы с коррупцией экстремизмом. Приравнивание людей из ФБК к террористам. Не утешайтесь тем, что вас это не коснется. Коснется, просто начали с нас. https://t.co/VZQTUpcOA1

— Maria Pevchikh (@pevchikh) April 26, 2021

Тој смета дека руските власти се плашат од активностите на тие организации и демонстрации за поддршка на Навални.

Канцеларијата на Навални во Москва навела на Телеграм дека „повеќе не може да работи во стариот формат“ поради таа одлука.

„Би било премногу опасно за нашите вработени и за нашите поддржувачи“, посочија од таму.

Сепак, ветуваат дека ќе продолжи борбата против корупцијата. „Нема да биде лесно да се бориме, но апсолутно ќе победиме затоа што нè има многу и сме силни“, додаваат од канцеларијата.

Во средината на април, руското обвинителство побара организациите поврзани со Алексеј Навални да бидат квалификувани како „екстремистички“, поради што може да бидат забранети, со можност за затворска казна за соработници и приврзаници.

Обвинителството ги обвинува тие организации за „под превезот на либералните пароли“ кои се обидуваат да „создадат услови за дестабилизација на социјалната и социо-политичката состојба“ во Русија.

Денес се одржа подготвително рочиште за овој случај.

44-годишниот Навални, кој издржува затворска казна во траење од две и пол години, во петокот го прекина 24-дневниот штрајк со глад, поради влошена здравствена состојба.

Тој беше уапсен веднаш штом се врати од Германија во јануари, по петмесечно закрепнување од труењето за кое директно го обвинува рускиот претседател Владимир Путин.

Навални тогаш беше осуден на затворска казна затоа што ја прекрши условната казна од 2014 година со тоа што замина на лекување во Германија.