Одбранбената индустрија може да ѝ донесе победа на Русија во Украина зашто произведува трипати повеќе артилериска муниција отколку што на Киев може да му достават неговите западни сојузници – САД и европските земји.

Русија произведува по околу 250.000 парчиња артилериска муниција месечно, односно по околу 3 милиони годишно, објави Си-ен-ен, повикувајќи се на разузнавачки проценки во НАТО и на извори вклучени во западните обиди за вооружување на Украина. САД и Европа заедно имаат капацитет да произведат само по околу 1,2 милион гранати и проектили годишно, наменети за Киев, изјавил за Си-ен-ен анонимен висок европски разузнавачки функционер.

Американската војска постави цел до крајот на 2025 година да произведува по 100.000 парчиња муниција месечно, што е двојно помалку од капацитетот на Русија. Дури и таа цел е неостварлива сѐ додека пакетот помош за Украина во вредност од 60 милијарди долари е блокиран во Конгресот во Вашингтон.

– Сега сме во војна на производство. Исходот во Украина зависи од тоа колку секоја страна е опремена за да ја води оваа војна – изјавил за Си-ен-ен висок функционер на НАТО.

Русија сега на фронтот пука по околу 10.000 гранати секој ден, додека Украина возвраќа со по 2.000. Овој однос е уште поизразен на некои места на линијата на раздвојување долга 1.000 километри.

Руските погони работат 24/7

Кусокот ја погодува Украина веројатно во клучниот момент од војната откако Русија во февруари 2022 година тргна кон Киев. Се потрошија парите што Америка ги издвојуваше за вооружување на Украина, а републиканската опозиција во конгресот не дозволува да се испраќа уште.

Русија, во меѓувреме, воспостави контрола врз украинскиот град Авдиивка и има иницијатива на бојното поле. Украина се мачи не само со муницијата, туку и со недоволно борци на линијата на фронтот.

САД и другите сојузници во изминатите две години ѝ дадоа на Украина модерно оружје, вклучувајќи ги американските тенкови „м-1 абрамс“, а наскоро и борбени авиони „ф-16“. Но, воените аналитичари велат дека во војната ќе победи таа страна што ќе испука повеќе артилериски гранати.

– За главен проблем сега ја сметаме муницијата. Тоа се артилериските гранати, бидејќи Русија направи значителна производствена предност, што ѝ даде значителна предност на бојното поле – вели изворот на Си-ен-ен од НАТО.

Тој објаснува дека руските фабрики за артилериска муниција работат 24 часа дневно, седум дена во неделата, со смени од по 12 часа. Во одбранбениот сектор сега работат околу 3,5 милиони руси, речиси двојно повеќе во споредба со периодот пред војната. Русија исто така увезува муниција. Иран лани ѝ доставил најмалку 300.000 артилериски гранати, а Северна Кореја испорачала најмалку 6.700 контејнери во кои имало милиони гранати.

– Русија вложи сѐ што има во играта. Нејзината воена машина работи со полна пареа – изјавил разузнавачкиот извор во САД.

На режимите им е полесно

Експертите се согласуваат дека Русија нема доволно голема предност за да спроведе голема офанзива во Украина во скоро време ниту, пак, ќе може уште долго да го издржи производственото темпо – фабриките ќе го достигнат врвот во текот на идната година.

Но, тоа сѐ уште е многу повеќе отколку што САД и Европа може да произведат и да ѝ достават на Украина. САД може да возвратат само ако претседателот Џо Бајден го активира Законот за одбранбено производство, што на Белата куќа ѝ дава моќ да им нареди на компании да го забрзаат и да го зголемат производството за да ја поддржат националната одбрана. Европските земји настојуваат да го зголемат производствениот капацитет. Германска приватна компанија во февруари објави дека ќе отвори свој погон во Украина, во кој ќе се произведуваат стотици илјади парчиња муниција во калибар од 155 милиметри за хаубици. Во нов погон, но во Германија, ќе се произведуваат по околу 200.000 гранати.

Европски функционери објаснуваат дека во земја со автократска власт како Русија лесно може, дури и преку ноќ, да се отворат фабрички погони, но западните капиталистички системи со време може да го надминат јазот и да произведуваат поквалитетна опрема.

– Ако можете директно да ја контролирате економијата, тогаш може да напредувате побрзо од другите земји. Западот дури сега ја зајакнува инфраструктурата за зголемување на производствениот капацитет за муниција. Западот ќе има поодржлива моќ – изјави пред една недела генералот Стивен Башам, поткомандант на Европската команда на американските воени сили.

Кога беше активен првиот голем пакет финансиска помош од САД за Украина, американската армија го зголеми производството на артилериски гранати во погоните во Пенсилванија, Ајова и во Тексас. Тоа ќе се повтори ако биде одобрен новиот пакет од 60 милијарди долари. САД ќе доцнат, но ќе можат да го стасаат производствениот капацитет на Русија.

– Сега не оди добро, но ако помошта биде обновена, не е сѐ изгубено – изјавил за Си-ен-ен анонимен разузнавачки извор.

Помалку проектили повеќе дронови

Москва направила темелни пресметки за војната во производство, што може да се види и од дејството на нејзините сили во Украина.

– Минатата есен тие ја гаѓаа критичната инфраструктура. Сега гледаме дека гаѓаат и бази на украинската одбранбена индустрија – вели претставникот на НАТО.

Русија секој месец произведува по 115 до 130 долгострелни проектили и помеѓу 300 и 350 самоуништувачки беспилотни летала од иранскиот модел. Пред војната Русија имаше илјадници долгострелни проектили во својот арсенал, но сега има во резерва едвај 700, смета НАТО. Намаленото користење проектили е компензирано со поактивно вклучување на дронови, речиси четирипати повеќе отколку пред една година.

Многу поголем предизвик за Русија е капацитетот за производство тенкови. Сега може да испорача по 125 тенка месечно, но од тоа стотина се обновени.

– Иако Русија има во хангарите околу 5.000 тенкови, голем дел од нив не може да бидат обновени за борба и служат само како „магацини“ за резервни делови – вели изворот од НАТО. Тој додава дека Русија во изминатите две години војна изгубила 2.700 тенка, двојно повеќе од бројот со кој во февруари 2022 година ја почна инвазијата.

Проблемите на концентрираното производство ќе се одразат во Русија дури по години, со голема криза.

– Војната ја трансформираше руската економија. По распаѓањето на Советскиот Сојуз водечки сектор беше производството на нафта, а сега е одбранбениот сектор, што е платено со парите спечалени од енергетскиот. Тоа создава долгорочни нарушувања, што ќе бидат проблематични за Русија, но сега сѐ функционира, барем во следните година и пол – вели генералот Башам.