Русија го прифаќа извинувањето на Вучиќ во врска со гласањето на Србија во ОН, го сметаат за техничка грешка
Русија го прифати извинувањето на српскиот претседател Александар Вучиќ во врска со гласањето на Србија во Обединетите нации.
Препорачано
Портпаролот на Кремљ, Дмитриј Песков во Москва ги коментираше актуелните настани, вклучително и гласањето во Генералното собрание на Обединетите нации (ОН) за европската резолуција за Украина.
Песков, потсетувајќи дека Вучиќ им се извини на граѓаните на Србија за тоа што неговата земја гласаше за европската резолуција за Украина, рече дека Русија разбира дека тоа е вистинска грешка.
„Секако, го слушнавме и го забележавме“, рече тој на прашањето дали Кремљ го забележал извинувањето на Вучиќ.
„Се случуваат технички грешки“, рече Песков.
Вучиќ синоќа изјави дека верува оти неговата земја направила грешка и требало да се воздржи.
„Мислам дека Србија направи грешка денес. За тоа им се извинувам на граѓаните на Србија, а вината за тоа ја сносам сам, затоа што веројатно сум уморен и оптоварен и не можам сè да завршам“, рече Вучиќ за време на гостувањето на ТВ Хепи.
Советот за безбедност на Обединетите нации синоќа усвои резолуција со која се повикува на брз крај на тековната војна и воспоставување траен мир меѓу Русија и Украина.
