Русија побара од ко-основачот на Пинк Флојд, Роџер Вотерс, да зборува пред Советот за безбедност на ОН на денешниот состанок на кој Москва побара да разговара за испорака на оружје во Украина, пренесува „Ројтерс“.

„Руската дипломатија порано беше сериозна. Кој е следен? Мистер Бин?“ рече дипломат на Советот за безбедност на ОН за британската агенција, кој сакал да остане анонимен.

Вотерс беше критикуван од поддржувачите на Украина кога објави отворено писмо на својата веб-страница во септември до украинската прва дама Олена Зеленска. Тој исто така не се согласува со западното снабдување со оружје на Киев.

15-члениот Совет за безбедност се состана десетици пати откако Русија ја нападна соседна Украина на 24 февруари минатата година.