Претседателката на Европската комисија, Урсула фон дер Лајен, денес во официјално соопштение го осуди еден од најголемите руски напади со беспилотни летала врз Украина, оценувајќи дека Кремљ повторно „ѝ се потсмева на дипломатијата и убива неселективно“.

„Вечерва, Русија изврши еден од најголемите напади со беспилотни летала и ракети врз Украина, таргетирајќи владини згради и цивилни домови“, вели Фон дер Лајен додавајќи дека „Кремљ повторно ѝ се потсмева на дипломатијата, го гази меѓународното право и убива неселективно“.

Таа нагласи дека Европа стои и ќе продолжи целосно да стои зад Украина.

„Ги зајакнуваме вооружените сили на Украина, градиме трајни безбедносни гаранции и ги заоструваме санкциите за да го зголемиме притисокот врз Русија. Убиствата мора да престанат“, рече фон дер Лајен.

Во ноќешниот голем руски напад врз Украина, беа погодени станбени згради, како и владината зграда во Киев, а две лица беа убиени, додека дваесет беа повредени, според украинските власти. Украинските воздухопловни сили објавија дека Русија лансирала 805 дронови и 13 ракети преку ноќ, од кои 751 биле соборени.