Селекторот на англиската фудбалска репрезентација, Герет Саутгејт мораше да направи големи и важни одлуки околу конечниот список на играчи на кои ќе смета за Европското првенство од 14 јуни до 14 јули во Германија.

Во составот не се наоѓаат искусни фудбалери како Џек Грилиш и Хари Мегваер што ги изненади англиските фанови.

Поранешниот напаѓач на Англија и Манчестер јунајтед, Вејн Руни по пријателскиот натпревар со Исланд (0:1) проговори за отсуството на дефанзивецот Мегваер.

– Натпреварот против Исланд ја покажува важноста на Хари Мегваер за англискиот тим и колкава е загубата што го немаме во овој тим – рече Руни, цитиран од „Канал 4“.

Мегваер нема да настапи на Европското првенство поради повреда на потколеницата. Овој 31-годишен фудбалер одигра 31 настап за Манчестер јунајтед во сите натпреварувања во сезоната 2023/24, постигнувајќи четири гола и запишувајќи две асистенции.

На ЕП селекцијата на Англија е во група со репрезентациите на Србија, Данска и Словенија.