Минатогодишниот добитник на престижната книжевна награда „Роман на годината“, романот „Единствен матичен број“ на Лидија Димковска, на 26 февруари, со почеток во 19 часот, во кафе-барот „Везилка“, ќе има промоција во Битола.

– „Единствен матичен број“ е роман што ги синтетизира сите несреќи на ова тло во внатрешното отуѓување на човекот и во неодговорените прашања делејќи го идентитетот на намислен и вистински. Лидија Димковска зборува за сивата неприпадност и бездушноста која е предзнак на пустелијата, вовлечена во нашето секојдневие. Исклучително актуелен, исткаен со препознатливиот комплексен и сигнификантен стил на оваа голема македонска писателка, ова е еден од најубавите романи во македонската проза, овенчан со најголемата книжевна награда во земјата – истакнува Сашо Огненовски.

Романот е во издание на издавачкиот центар „Три“, а промотори на делото на Лидија Димковска во Битола ќе бидат Виолета Танчева-Златева и Сашо Огненовски.

Гости на промоцијата ќе бидат авторката Лидија Димковска и Катерина Богоева, претставничка на фондацијата „Славко Јаневски“. Промоцијата ја овозможи „Mint Fintech Group“.