Во финалето од ракометниот Куп на Македонија одиграно во салата „Билјанини извори“ во Охрид составот на Вардар 1961 го совлада Еурофарм Пелистер со 26:25. Скопските „црвено-црни“ го одбранија трофејот, по 16 пат во својата клупска историја се закитија со куп титулата.

Играчите на Владо Недановски воглавно го контролираа резултатот, по првите 30 минути имаа предност од „плус четири“ (16:12). Се врати битолската екипа на стартот од вториот дел и позитивата на Вардар 1961 беше само „плус два“ (18:16).

Во понатамошниот период Вардар 1961 го врати водството од четири гола разлика по погодоците на Талески и Дутра. Не се предаваше екипата на Александар Јовиќ која во 54 минута стигна до „минус еден“ и на семафорот стоеше 24:23.

Имаше шанса Еурофарм Пелистер и да израмни, но Ристовски му одбрани „зицер“ на Ојлески, по што следуваа два гола на Вардар за 26:23 на три минути пред крајот на средбата.

Вардар дозволи повторно да се вратат играчите на Јовиќ на „минус еден“ (26:25), не го искористи ни својот последен напад, а за Еурофарм Пелистер останува уште малку време да дојде до егал. Скопскиот тим не му дозволи на противникот да израмни, односно во таа намера успеа да го спречи Атанасијевиќ.

Во победничките редови први стрелци со седум голови беа Моралес и Фереира, а на спротивната страна по пет имаа Хосни и Суси.

По завршувањето на мечот беа доделени и индивидуалните признанија кои завршија кај ракомеатарите на Вардар 1961. Борко Ристовски беше прогласен за најдобар голман, потоа најдобар стрелец е Дејан Манасков, а за најкорисен играч (МВП) е прогласен Бразилецот Леонардо Дутра.