Дуелот ќе се игра утре (понеделник, 10 јуни) од 20.45, немавме среќа против Полска, но Австрија е шансата за момците на Ангеловски да се вратат игра за првите две позиции во групата.

Поради црвениот картон право на настап нема Висар Муслиу, а најавено е дека ќе игра дефанзивецот на Спортинг Лисабон, Стефан Ристовски, се работело само за грч.

Елиф Елмас кој имаше неколку падови и силни физички дуели со Полјаците, има оток на скочниот зглоб и 70% се шансите дека нема да настапи.

– Не успеавме да постигнеме гол против Полска, се надеваме дека тоа ќе го направиме против селекцијата на Австрија, а нам бодовите ни се потребни. Против сите репрезентации одиме на голови, да бидеме подобри. Жалиме што не успеавме барем нерешено да извлечеме против Полска, но одиме напред и се избориме за позитивен резултат на наредниот меч – изјави репрезентативниот напаѓач Илија Несторовски.

Како што и потврдија од австриската федерација, ѕвездата на Баерн Минхен Давид Алаба поради повреда нема да дојде во Скопје. Бундеслигашкиот стил ја краси селекцијата на Австрија, се потпираат на дуел-игра и трчање.

– Наше е да се залагаме, без штедење на силите, максимално ќе му пристапиме и на мечот против Австрија. Иако игравме добро против Полјаците, не успеавме да освоиме бодови. Секоја селекција има свој стил на игра, нашиот утрешен ривал поседува добри индивидуалци. Најавено е дека Алаба со сигурност нема да игра. Дел од нив се под знак прашалник. Можеби тоа е и дел од нивната тактика. Како и да е, размислуваме напаѓачки со цел да триумфираме и ги израдуваме нашите навивачи – беа зборовите на селекторот Игор Ангеловски на денешната прес конференција.

Австрија во својот последен меч од квалификациите славеше над Словенија (1:0). Наредниот тренинг нашите најдобри фудбалери ќе го имаат денеска од 19.15 часот на ФФМ Тренинг центарот „Петар Милошевски“, Скопје.