Фудбалската репрезентација на Македонија освен што има нов селектор во Благоја Милевски, исто така ќе има и нов капитен по повлекувањето на Горан Пандев. На утрешниот натпревар против Ерменија, капитенската лента ќе ја носи Стефан Ристовски кој е еден од најискусните репрезентативци кој од 2011 година е дел од сениорскиот тим на Македонија.

– Јас уште еднаш сакам да му се заблагодарам на Горан Пандев за сѐ што има постигнато за оваа селекција, а има многу и тој треба да ни биде пример на сите како да се продолжи по патот. Јас се надевам дека ќе го испратиме како што доликува, а огромна е честа што јас сум капитен на оваа генерација. Благодарност и до селекторот што ми даде доверба, а најмногу би ме радувало ако сите ние сме пример како се носи дресот на својата земја, со пристапот на и надвор од теренот и со давање максимум секојпат за Македонија. Ние постарите треба да сме пример на оваа генерација, но во фудбалот нема стари и млади, теренот е тој каде се одговара на предизвикот. И јас само можам да ветам дека ќе давам максимум и дека ќе бидам пример како нашиот досегашен капитен Пандев – вели Ристовски.

Новиот капитен се надева на позитивен резултат на утрешниот натпревар.
Во фудбалот е таков и дојде до тоа да нема многу време за размислување. Имаме доста промени, но ние сме професионалци и треба да да продолжиме таму каде застанавме и јас се навевам на нов и убав почеток. Македонија сега сите ја гледаат со други очи, доаѓаме после настап на Европско првенство, без оглед што не освоивме бодови, без оглед што имаме промени, но мисам дека треба да продолжиме така да се однесуваме, да се цениме и ова да ни биде голем поттик и да имаме уште големи желби за победи и остварувања за да стигнеме до тоа што сме го зацртале – вели Ристовски.