Отсекогаш сум велел дека решението за т.н. македонско прашање, нешто за што речиси два века се зборува во дипломатијата и европските политики и го пишува во учебниците по историја, дури и Бизмарк зборувал дека клучот за стабилноста на Балканот лежи во решавањето на македонското прашање. Вие, заедно со сите нас кои ја поддржуваат земјава, го имате решението за македонското прашање, а тоа е оваа земја во нејзините граници, демократска, мултиетничка, со добри односи со соседите и целосно интегрирана во евроатланските структури – НАТО и ЕУ, изјави дипломатот Филип Рикер во интервју за емисијата „360 степени“ на МТВ.

Тој додаде дека тоа е патот, кој можеби честопати е тежок, разочарувачки, фрустрирачки и можеби изгледа нефер, но е најдобриот пат.

– Не можам да замислам земјата да напредува без да продолжи кон зачленување во ЕУ и мислам дека тоа ќе се случи. По приемот во НАТО и по решавањето на прашањето на името преку склучувањето на Преспанскиот договор, бев многу задоволен и си реков, сега ЕУ е наредниот чекор – рече Рикер.

Поранешниот амбасадор на САД во земјава додаде дека американската позиција е да се поддржи евроатлантската интеграција, вклучувајќи го и членството на Северна Македонија во ЕУ.

– Мислам дека тоа ќе се случи, но треба да останете на патот. Се обидувам да бидам во контакт со луѓе во ЕУ, каде што постои голема поддршка и не мислам дека граѓаните треба да се обесхрабруваат – ако се фокусирате на целта, ќе стигнете таму и ќе завршите нешто што е многу важно за иднината на земјата. Очекувам тоа да го видам во годините што претстојат – рече Рикер.

Корупцијата е неприфатлива и, што е најважно, неприфатлива е за граѓаните, дополни Рикер.

– Тие (граѓаните) се фрустрираат и не сум баш сигурен дека сите станаа за да се спротивстават и да кажат дека ова веќе нема да го трпиме. Тоа мора да биде колективна одлука. Треба да се навратите на изминатите искуства и во името на граѓаните да се побара нешто што е вообичаено за една демократија – да има промена и сите треба да преземат чекори за искоренување на корупцијата – рече дипломатот.

Тој додаде дека прашањето за корупција е предизвик, затоа што е дел од човековата природа, каде било во светот, но верува дека земјата може да успее и да напредува во борбата против корупцијата.
Поранешниот амбасадор рече дека со „црната листа“ САД ги потенцира луѓето што нанесуваат штета, а луѓето во земјава го користат тоа како сигнал.

– Најважно е што вие правите тука, какви одлуки носите, кого ќе повикате, на пример, претставници на судството, на полициските служби, за да го применуваат законот и владеењето на правото како ’рбет, не само на одржлива демократија, туку и на промовирањето силна економија, просперитет, можности, и тоа е клучно – рече Рикер.