Поп ѕвездата Ријана неодамна испрати донација за бездомните ветерани кои живеат во Лос Анџелес.

Како што дознава „Пејџ Сикс“ (Page Six), Ријана се обратила до здружението „Секогаш за луѓето“ (Always For The People) и направила поголема донација за да им го олесни животот на ветераните со посебни потреби, кои останале без своите домови.

Имено, таа го повикала основачот на организацијата Сенет Девермонт, кој потоа проследил стотици хигиенски пакети, чорапи, облека, вреќи за спиење, храна, чевли, тоалетна хартија, храна за кучиња.

Ова не е прв пат поп дивата да дава поддршка на ветерани. Таа ги посетила во 2022 година, кога била бремена со својот прв син, РЗА, а потоа со часови ги слушала нивните грижи и проблеми, и сето тоа тајно.

Луѓето кои работеле со неа во тоа време велат дека оставила неизбришлива трага кај луѓето во кампот за бездомници пред Медицинскиот центар ВА (VA). Многу бездомници биле воодушевени од нејзиниот гест и посета.

За потсетување, Ријана и нејзиниот партнер Ејсап Роки неодамна повторно станаа родители. Полот и името на нивното второ дете сѐ уште се непознати за јавноста, а пред само неколку месеци го открија името на нивното прво дете – RZA Athelston Mayers.