По претходно донесена одлука на Управниот одбор, денеска Ракометната федерација на Македонија (РФМ) ја исплати наградата во износ од три милиони денари на машката сениорска репрезентација за настапот на Светското првенство 2025 во Хрватска, Данска и Норвешка.

Нашите најдобри ракометари настапија во градот Вараждин, Хрватска, и се пласираа од прелиминарната во главната фаза од натпреварувањето.

Во прелиминарната фаза ракометарите ремизираа со Унгарија (27:27), загубија од Холандија (37:32), а триумфираа над Гвинеја (29:20).

Во рамките од главната фаза на СП Македонија одигра нерешено со Австрија (29:29), оствари победа против Катар (39:34), а претрпе пораз од Франција (32:25).

Нашата селекција во конечниот пласман на Светското првенство го освои 15. место.

Машката сениорска ракометна репрезентација го задржа континуитетот на настапи на големите натпреварувања, обезбедувајќи учество на деветтиот последователен ракометен Мундијал.