Овој предмет е направен за спас на Јордан Камчев, за рушење на Специјалното јавно обвинителство, зашто им сметаше и на ВМРО-ДПМНЕ и на СДСМ, изјави на денешното продолжение на судскиот процес за „Рекет“ првообвинетиот Бојан Јовановски познат како Боки 13.

– Со Катица Јанева сум зборувал на многу теми, затоа што немала предрасуда за мојата сексуална ориентација. Кога ме притворија, велеа Боки пед*р. Па потоа премиерот ме нарече пед*р. И Јанева беше жена која со мене оствари пријателска комуникација, базирана на професионален однос Со Јанева имав пријателски однос затоа што таа беше непосредна жена. За конкретен предмет односно „Империја“ не сум разговарал со неа. Јас ја запознав во септември, а тој предмет се видел една година претходно. Овој предмет е направен за спас на Јордан Камчев и за рушење на СЈО, како и за уривање на 1ТВ. Без вештачењето на мојот телефон јас тука во судницата играм танго бос – метафорично зборувам. Ако со некого разговарам за килажа, мода и љубовни проблеми, не можам како цивил да вршам претпоставено влијание врз обвинителка која дрма и тресе. Катица Јанева беше многу резервирана во давањето на информации и имавме опозитна состојба во која јас сум бил директно брифиран од Вилма Русковска кога ќе испитува и ми бараше да пуштам новинар. Русковска имаше амонизет кон Катица Јанева – рече Јовановски.

Бојан Јовановски во продолжение на денешното судење зборуваше и за обвинетиот и осуден во Рекет, Зоран Милевски Кичеец.

– Жалам што го познавам Зоран Милевски Кичеец, кого го запознав пред 15 години кога дојде во Скопје и го отвори кафулето Ден и ноќ, беше популарен. Бевме блиски, но веќе не сме. Познанството го интензивирале во мај 2018 година кога инсистирал Боки да се сретне со Камчев, за кого работел. Ме импресионираше и со познанства кои ги има во странство, но и со блиските контакти со политичари тука, порано со тогашната па со сегашната власт. Не знаев што работи во Орка, па Камчев еднаш ми објасни. Рече дека Кичеец е најдобриот оперативец, а тоа сфатив самиот во изминатиов период. Неговите способности се гледаа и преку тоа што стално му наоѓаа мобилни во затворот, кои Рускоска исто така не ги вештачела, па и од Шутка си ги правел патот кон слободата – рече Јовановски.

Во моментов е дадена пауза, по барање на Јанева на која и се слоши. Претходно реагираше Рускоска која негодуваше кон судот зошто дозволил Јовановски да дава лични квалуфикации за неа и за Кичеец, а не зборува за доказите кои ОЈО ги презентирало.

Вилма Рускоска одговори на обвинувањата на Боки 13, кој изјави дека обвинителката му кажувала кои ќе бидат на распит за да прати камера. Рускоска побара од институциите да испитаат дали таа направила некаков криминал.

– Ќе има одбрана по наводите, или само некој ќе се велича, а по други ќе се плука? Јас сум на ред, Милески е на ред, нека обвинителството достави и претстави доволно докази пред овој Суд за да во одбрана се осврне на тие докази кои обвинителството ги презентираше. Да се навлегува во личен и приватен живот на некого е недозволиво. Дали Вилма Рускоска или било кој направил кривично дело или криминал, има институции кои тоа можат да го истражат, и јас барам да се истражат. А сега дајте му да се осврне на доказите, не само пред Судот, туку пред целата јавност – рече Рускоска.