Во рамките на ПИН Музичката конференција и шоукејс фестивал на 29 ноември 2024 година, во просториите на МКЦ, официјално беше претставена новата регионална дигитална платформа „Креатив гејт“.

Создадена од Фондацијата „Егзит“ и фестивалот „Таксират“, новата регионална дигитална платформа „Креатив гејт“ (Creative Gate) е дел од проектот „Култура и креативност за Западен Балкан“ (CC4WBs), финансиран од Европската Унија.

Оваа иновативна платформа е замислена како катализатор за развој на културните и креативните индустрии, поттикнувајќи дијалог и зајакнување на социјално-економските влијанија во регионот.

Со „Креатив гејт“ културата добива ново место за раст и развој преку вмрежување, соработка и заеднички успеси. Платформата е создадена да го поддржи секој чекор на креативците од регионот, овозможувајќи им простор каде нивните идеи можат да се трансформираат во значајни проекти.

Инспиративни зборови за целта и визијата на платформата на нејзината промоција во МКЦ во Скопје споделија Клер Сирс од Британскиот совет, директорка за Западен Балкан; Алма Мрган-Слипичевиќ од УНЕСКО; Ида Силљановиќ од Фондацијата „Егзит“; Милош Ѓуроски, претставник на „Represent Communications Skopje“, кој зборуваше за развојот и дизајнот на платформата; Рамона Моња Кочишка од фестивалот „Таксират“ и домаќин на ПИН Музичката конференција.

Платформата „Креатив гејт“ е координирана и поддржана од УНЕСКО, Британскиот совет и Италијанската агенција за развој (AICS), со заедничка мисија да создадат одржлив и инклузивен креативен екосистем, кој го вреднува културното наследство и иновациите како темели за регионална соработка.

За таа цел од „Пасворд продукција“ апелираат до раководителите на културни центри, фестивали или настани во областа на музиката, филмот, театарот, танцот, архитектурата, визуелната и други уметности, да се регистрираат на платформата. „Креатив гејт“ има за цел да ги олесни соработката и размената на идеи, градејќи посилни врски меѓу културните заедници во регионот.

(Текстот е објавен во „Културен печат“ број 260, во печатеното издание на весникот „Слободен печат“ на 14-15.12.2024)