Секоја домаќинка сака да подготви ручек што ќе го пофалат сите на масата. Меѓутоа, често се случува и покрај големата волја, да недостасува инспирација. Едно од јадењата што никогаш не може да ви здодее и кое ќе ги задоволи и најпребирливите непца се ќофтињата.

Ќофтињата може да се подготват во различни сосови, а оние во сос од домати станаа синоним за јадење од домашната кујна што ја загрева и душата и телото.

Нивната подготовка е многу едноставна.

Состојки:

– 500 грама мешано мелено месо
– 1 јајце
– 1 кромид, ситно сечкан
– 3 чешниња лук, ситно сечкани
– 2 лажици презла
– 2 лажици сув билен зачин
– 1 лажица масло
– сол и бибер
– 2 лажици мелена слатка пиперка

За сосот:

– 500 мл пасиран сок од домати
– 6 дл чаши вода
– 50 мл масло
– 3 лажици брашно
– сол
– 1 лажица шеќер

Подготовка:

Во сад измешајте ги меленото месо, јајцето, кромидот и лукот, презлата, сувите билни зачини, маслото, солта, биберот и мелената пиперка и оставете да отстои половина час во фрижидер.
Со раце формирајте ги ќофтињата. Пржете ги на масло, со малку брашно, па додадете им ги пасираните домати, мешајте, сипете вода, па додадете ги зачините. Откако ќе зоврие, оставете да се крчка (намалете ја температурата) и варете околу 40 минути.
Како прилог додадете пире од компири.