Кифличките се едни од најомилените деликатеси од тесто во секој дом. Некои сакаат обични, други солени кифлички со сирење, а има и такви што уживаат во вкусот на слатки кифлички со џем.

Рецептите се пренесуваат од генерација на генерација и речиси секое семејство има своја верзија на рецептот и некоја тајна состојка што на кифличките им дава специфичен вкус.

Доколку немате скриен и таен рецепт, а сакате да направите слатки или солени кифлички, на вистинското место сте. Без разлика дали ви требаат едноставни рецепти и сакате да направите брзи кифлички со сирење, празни домашни кифлички, слатки кифлички со џем или крем, ви донесуваме едноставен и брз рецепт.

Состојки:

– 500 милилитри млако млеко

– 200 милилитри масло

– 1 јајце

– 40 грама квасец

– малку сол и шеќер

– 1 килограм брашно

За премачкување:

– 1 јајце

– сусам по потреба

– маргарин по потреба

Подготовка:

Во сад растворете го квасецот во млакото млеко и додајте неколку лажици брашно и прстофат шеќер. Овие состојки убаво измешајте ги, а потоа во истиот сад додајте го и маслото, како и солта, јајцето и брашното.

Убаво измесете ги сите состојки.

Кога ќе добиете меко тесто, не мора да чекате да стаса за од него да подготвите кифлички. Веднаш почнете со подготовката. Од тестото формирајте топчиња од кои подоцна ќе обликувате кифлички. Од овој рецепт најчесто излегуваат околу 50 кифли.

Добиените кифли редете ги во тепсија за печење.

На крај, намачкајте ги со јајце, наросете ги со сусам, ставете им малку маргарин одозгора и вака подготвените кифли, печете ги во претходно загреана рерна на температура од 180 степени околу 20 минути.

Направете ги сите кифлички наеднаш, така што додека се печат во едната тепсија, другите кифлички ќе имаат време да стасаат.