Рецепт за домашен сладолед од праски, потребни ви се само 3 состојки!
Доколку сте љубител на сладолед и постојано пробувате нови вкусови и нови начини на подготовка на овој најомилен летен деликатес, тогаш најдобро е да ги засукате ракавите, да прошетате до кујната и да подготвите неверојатно вкусен сладолед што ќе ве воодушеви со својот вкус.
Препорачано
Домашниот сладолед од праски е совршено освежително задоволство, а за неговата подготовка ви се потребни само три состојки!
Состојки:
– 500 милилитри слатка павлака
– 500 грама праски
– 150 грама шеќер
Подготовка:
Пред да почнете со подготовката на сладоледот од праски, убаво измијте ги и излупете ги праските. Потоа исечкајте ги на мали парчиња и ставете ги во мало тенџере. Во истиот сад додајте малку вода и оставете ги праските кратко да се варат. Кога овошјето ќе омекне, исцедете ја водата и убаво миксирајте ги со рачен блендер.
Добиената смеса од праски, префрлете ја во друго тенџере и во него додајте го шеќерот. Загрејте ги состојките и мешајте додека убаво не се соединат, а шеќерот комплетно не се стопи.
Вака подготвената смеса тргнете ја настрана и оставете ја да се излади.
Во друг сад изматете ја слатката павлака, а потоа соединете ја со смесата од праски и шеќер. Убаво изматете. Добиениот сладолед од праски, оставете го да се излади најмалку 3 часа пред да го послужите.
