Килијан Мбапе летово конечно пристигна во Реал Мадрид, а вчера во натпреварот од Суперкупот на Европа го постигна својот прв гол уште во дебитантскиот настап.

Но, трансферот на Мбапе значи и поголеми трошоци за фановите на „кралевите“ кои редовно се на „Сантијаго Бернабеу“. Имено, влезниците за првиот домашен натпревар во второто коло против Ваљадолид се повисоки за дури 70% во однос на минатата сезона.

Најевтиниот билет сега е 95 евра, додека во минатата сезона тој изнесуваше 55. Најскапиот сега се продава по цена од 210 евра. Дали ваквите цени ќе влијаат на посетеноста ќе биде познато на 25 август кога Реал ќе го игра натпреварот.

Треба да се знае и дека цените на влезниците за натпреварите на Реал Мадрид не се фиксни и тие варираат во зависност од ривалот, па така може да се очекува за дуелите со Барселона или Атлетико да бидат уште поскапи.

Ваљадолид минатата сезона играше во Втората шпанска лига и сезонава се враќа во друштвото на најдобрите и припаѓа во групата на неатрактивни противници, но треба да се земе предвид и тоа што станува збор за првиот натпревар на Мбапе пред домашната публика.