Реакција на срамното навивање на „гробарите“: Говорот на омраза треба да се санкционира
Бурни реакции во јавноста предизвикаа вчерашните случувања на натпреварот помеѓу Партизан и Вардар одигран во Белград во рамките од СЕХА лигата, а кој заврши со победа на домаќините од 28:22.
Претседателот на Партијата на Македонците во Србија, Горан Илијевски, во име на сите македонски навивачи на Партизан реагира и бара од ракометниот клуб да го осуди навредливиот транспарент и скандалозното навивање на „гробарите“ на вчерашниот натпревар меѓу Партизан и Вардар. Српските навивачи истакнаа транспарент со натпис „Група со српско име слави бугарски војник, мора да ви е тешко со таа идентитетска криза во главата“, реферирајќи на „комитите“ од Скопје, чие име, според „гробарите“, било српско.
Очекувам од Ракометната федерација на Србија и надлежните институции во Србија да реагираат на говорот на омраза и соодветно да го санкционираат, вели Илијевски.
Освен ваквиот транспарент во текот на натпреварот „гробарите“ скандираа: „Јужна Србија, никогаш Македонија“, а можеше да се забележи и грчко знаме веднаш до теренот.