фото: facebook/Josko Milenkoski

Разговор со Јошко Миленкоски: ПАОК супериорно го освои Купот на Грција – ЕП 2023 во Македонија е извонредна можност за афирмација

Не се сомневам дека Европското првенство 2023 ќе биде организирано на највисоко ниво од страна на ОФМ и сите ќе ги почувствуваат придобивките од една ваква голема манифестација – вели Миленкоски.

Македонскиот тренер Јошко Миленкоски оваа сезона постигнува успеси со грчкиот одбојкарски клуб ПАОК со кој има шанси да се закити со двојната круна.

Најпрвин се закити со пехарот во Купот на Грција во чија завршница триумфираше над двата фаворити со ист резултат 3:1 против Панатинаикос и Олимпијакос.

Во средата во плеј-офот од грчката одбојкарска лига играчите на ПАОК со 3:0 во полуфиналната фаза го елиминираа составот на Панатинаикос, па исто како и во Купот, противник во финалната битка ќе им биде Олимпијакос.

Според Миленкоски овие успеси на неговиот клуб предизвикаа голем еуфорија и верните навивачи кои сигурно ќе ја даваат неопходната поддршка на патот ПАОК да дојде до нова круна.

– Купот на Грција е еден голем спортски настан, со голема традиција и публицитет. Особено оваа година грчката федерација се обиде да го организира на највисоко ниво поради фактот што во него учествуваат четирите, во моментов најдобри грчки екипи ПАОК, Олимпијакос, Панатинаикос и Милонас. Фаворити, впрочем како и секоја година беа двата Атински клуба Олимпијакос и Панатинаикос, но бидејки куп напреварите се секогаш полни со изненадувања, јас и мојот ПАОК се потрудивме да го потврдиме тоа. Го освоивме на супериорен начин победувајки ги двата најголеми грчки клуба и со тоа ја потврдивме нашата врвна форма во моментов. А фактот дека во вториот дел од сезоната редиме убедливи победи сам зборува за тоа. Исто така, во полуфиналниот натпревар од плеј-офот во 3 натпревари го елиминиравме големиот ривал Панатинаикос и се пласиравме во големото финалето во кое ќе игравме против Олимпијакос. Нашите успеси оваа година предизвикаа огромна еуфорија во Солун и армијата симпатизери ни дава огромна поддршка, која нема да изостане ниту во финалето. Ќе се потрудиме да одиграме на највисоко ниво, да ги оправдаме очекувањата на сите во клубот и ако може да приредиме уште еден сензационален резултат.

Годинава Македонија заедно со Италија, Бугарија и Израел ќе го организираат Европското првенство во сениорска конкуренција од 28 август до 16 септември. Нашата селекција е во групата „Ц“ заедно со Црна Гора, Полска, Холандија, Чешка и Данска.

фото: EPA-EFE/MAURI RATILAINEN

– Европското првенство во одбојка што ќе се одржи во Македонија, Италија, Бугарија и Израел е еден од најголемите настани во нашата спортска историја. Особено за нашиот спорт тоа е од непроценливо значење, поради фактот што е извонредна можност за афирмација. Од непроценливо значење е учеството на ова првенство на две репрезентации кои се рангот на најголемите во историјата, светските и олимписките шампиони од блиското минато Полска и Холандија, а покрај нив е и репрезентацијата со висок рејтинг, Чешка. Од друга страна, присуството на Црна Гора и Данска во нашата група дава посебен белег на ова ЕП, особено што ни дава можност за добар резултат и евентуален премин во вториот круг, што би бил еден извонреден и историски резултат. Не се сомневам дека првенството ќе биде организирано на највисоко ниво од страна на Одбојкарската федерација на Македонија и сите ќе ги почувствуваат придобивките од една ваква голема манифестација како што е Европското првенство.

Навивајте за Македонија: Пуштени во продажба билетите за Европското првенство во одбојка

 

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 100 ДЕНАРИ

Видео на денот