Полскиот министер за надворешни работи Збигњев Рау во четвртокот ги повика сите страни да покажат политичка волја за ставање крај на кризата меѓу Украина и Русија, говорејќи за време на посетата на Киев како претседавач со ОБСЕ, пренесува Ројтерс.

Организацијата за безбедност и соработка во Европа, која ги вклучува Русија и Украина, како и членките на НАТО, го следи конфликтот меѓу украинските сили и сепаратистите поддржани од Русија во регионот Донбас во источна Украина од 2014 година.

Украина и нејзините западни сојузници велат дека се загрижени дека Русија, која собра 100.000 војници во близина на границата и одржува заеднички воени вежби со Белорусија, планира инвазија на Украина. Москва ги негира ваквите планови.

„Ние сме сериозно загрижени за ситуацијата во и околу Украина. И во Донбас и во однос на растечкото воено присуство на Русија долж границата со Украина и во Белорусија“, рече Рау на брифингот.

Зборувајќи заедно со Рау, украинскиот министер за надворешни работи Дмитро Кулеба ја обвини Русија дека ја блокира работата на набљудувачите на ОБСЕ и ја саботира работата на Трилатералната контакт група, дипломатскиот форум кој се состои од Украина, Русија и ОБСЕ.

„Тешката ситуација не може да се реши без да се донесат тешки одлуки и затоа е невозможно ОБСЕ да остане трајно пасивно неутрална во овој процес“, рече тој.

ИНФОГРАФИК: Повеќе Европејци се на страната на Киев отколку на Москва