Постои еден вид бамбус наречен „хенон“ (“Phyllostachys nigra var. henonis“), кој цвета само еднаш на 120 години. Ботаничарите досега немаа можност да проучат како ова растение се регенерира, бидејќи интервалот помеѓу цветањето е многу долг.

Последното големо расцутување на овој вид бамбус се случило во 1908 година, и во помал обем се случило помеѓу 1903 и 1912 година, што значи дека следното големо цутење би требало да се случи околу 2028 година, пишува порталот  „ИФЛ саенс“ („IFL Science“).

Меѓутоа, во 2020 година, истражувачите од Универзитетот во Хирошима, открија еден примерок што процветал порано, давајќи им можност да проучат како се регенерира. За жал, тимот откри дека следното големо цутење може да значи катастрофа за производството на бамбус, но и за целата околина.

„Бамбусот не произведе семиња што би можеле да ‘ртат. Производството престана по цветањето. Три години немаше знаци на регенерација на овој бамбус по цветањето.“, вели првиот автор на студијата, Тошириро Јамада.

Тимот не откри никаква асексуална репродукција на растението во нивните набљудувања.

„Сите стебла се исушија на местото на истражување и не беа видливи знаци на регенерација на семиња, стебло или џуџести растенија. Резултатите сигнализираат мрачна иднина за хенонот во Јапонија: можно е овој вид тешко да се регенерира по цветањето“, објаснуваат научниците.

Авторите очекуваат дека регенерацијата на бамбусот ќе биде бавна и ќе трае повеќе години. Тоа значи дека тогаш нема да може да се бере бамбусот, што може да има сериозни последици за економијата.

Тие велат дека се загрижени и за последиците по животната средина, бидејќи ова изумирање може да доведе до драстични промени во вегетацијата и покривката на земјиштето.