Албанскиот премиер Еди Рама ја исклучи можноста за територијално обединување на Косово и Албанија во какви било други услови освен во Европската унија. Во интервју за „Клан Косово“ кое го пренесоа албанските медиуми, Рама рече дека „националното обединување значи само приклучување кон Европската унија, сѐ друго е бајка“.

Рама посочи дека старите регионални „формули“ од 19. и 20. век денес немаат место и дека приоритет треба да биде европската интеграција и зајакнувањето на меѓународните партнерства на Косово.

Изјавата доаѓа во време на засилени дебати околу европскиот курс на регионот и позиционирањето на Тирана и Приштина кон Брисел, но и на властите во Косово со Соединетите Американски Држави, кои го суспендираа Стратешкиот дијалог со Приштина поради активностите на тамошната техничка влада.

Според Вашингтон, владата во технички мандат „ги зголемила тензиите и нестабилноста“, со што „ги ограничила можностите за продуктивна соработка меѓу двете страни по заедничките приоритети“.

Кулминација на тензиите меѓу Вашингтон и Приштина – замрзнат стратешкиот дијалог САД-Косово