Обвинителството отвори истрага и предлага 30-дневен притвор за раководителот на секторот за урбанизам и комунални дејности во Општина Маврово и Ростуше, Садредин Елезоски, кој вчера беше фатен во Скопје со обележани пар кои ги примил како поткуп.

„Јавен обвинител од Основното јавно обвинителство за гонење на организиран криминал и корупција (ОЈО ГОКК), постапувајќи по кривичната пријава поднесена од МВР донесе Наредба за спроведување истражна постапка против едно лице“, велат од Обвинителството.

„Лицето како раководно службено лице од почетокот на годинава во повеќе наврати директно побарал и примил поголема имотна корист за себе и за трети лица за да извршат службено дејствие што морале да го извршат. Осомничениот во два наврати директно побарал од подносителот на барањето паричен износ од 16.000 евра, а потоа износот во понатамошните средби со оштетениот го намалил на 13.000 евра, за да тој и комисијата што одлучувала во управна постапка по барањето за издавање на урбанистички проект постапат по барањето на оштетениот. Дел од парите наводно биле за другите службеници вклучени во управната постапка за да одлучат во побрз рок. Со оглед дека било договорено парите етапно да бидат исплаќани како што ќе се одвива управната постапка, осомничениот за првото дејствие побарал износ од 4.400 евра“, велат од ОЈО ГОКК.

„Вчеравечер на договорената средба оштетениот му дал 2000 евра, кои осомничениот ги примил и бил фатен ин флагранти од страна на полициските службеници. Ценејќи дека се исполнети условите за определување на мерка притвор, јавниот обвинител на судијата на претходна постапка при Основниот кривичен суд Скопје предложи истата да му биде определена на осомничениот во траење од 30 дена“, додаваат од Обвинителството.

Раководителот од Маврово и Ростуше барал рушвет и за други службеници, го фатиле со 2.000 обележани евра