Рускиот претседател Владимир Путин е подготвен да стави крај на војната во Украина и да се согласи на прекин на огнот на постоечките борбени линии, но ќе продолжи да се бори доколку Киев и Западот не го прифатат тоа, изјавија четири руски извори за Ројтерс. Тројца извори запознаени со разговорите во кругот на Путин изјавија дека тој е фрустриран што украинскиот претседател Володимир Зеленски и западните земји не се согласуваат на преговори.

-Путин може да се бори онолку долго колку што е потребно, но тој е подготвен и за прекин на огнот – замрзнување на војната – изјави висок руски извор кој соработувал со Путин и има познавање за разговорите на највисоките нивоа во Кремљ.

Тој, како и другите извори споменати во оваа приказна, зборуваше под услов да остане анонимен поради чувствителноста на темата.

За овој извештај, Ројтерс разговараше со вкупно пет луѓе кои работат или работеле со Путин на високо ниво во политичкиот и деловниот свет. Петтиот извор не го коментираше замрзнувањето на војната на сегашните линии на фронтот.

Портпаролот на Путин, Дмитриј Песков, како одговор на барањето за коментар, рече дека шефот на Кремљ постојано јасно ставил до знаење дека Русија е отворена за дијалог за да ги постигне своите цели, велејќи дека земјата не сака „вечна војна“. Украинските министерства за надворешни работи и одбрана не одговорија на прашањата.

Назначувањето на економистот Андреј Белоусов за министер за одбрана на Русија минатата недела, според некои западни воени и политички аналитичари, ја подготвува руската економија за долготрајна војна.

Но, изворите велат дека Путин, претпочита да го искористи моментумот на Русија за да стави крај на војната. Не го коментираа директно новиот министер за одбрана. Врз основа на нивните сознанија за дискусиите во највисоките кругови на Кремљ, два извори рекле дека Путин верува дека досегашните успеси од војната се доволни за да му се објави победа на рускиот народ.

Тројца извори рекоа дека Путин разбира дека за секој голем напредок ќе биде потребна друга мобилизација, која тој не ја сака.

Можноста за прекин на огнот, па дури и за мировни преговори се чини далечна во моментов. Зеленски постојано изјавува дека мирот под условите на Путин не доаѓа предвид. Тој вети дека ќе ја врати изгубената територија, вклучувајќи го и Крим, кој Русија го анектираше во 2014 година. Тој потпиша декрет во 2022 година со кој формално ги прогласи преговорите со Путин за невозможни.

Еден од изворите предвидува дека не може да се постигне договор додека Зеленски е на власт, освен ако Русија не го заобиколи и не постигне договор со Вашингтон. Сепак, американскиот државен секретар Ентони Блинкен, говорејќи во Киев минатата недела, им рече на новинарите дека не верува дека Путин е заинтересиран за сериозни преговори.

Украина се подготвува за разговори следниот месец, во Швајцарија, која се понуди да биде домаќинц, со цел да се обедини меѓународното мислење за тоа како да се стави крај на војната. Разговорите се свикани на иницијатива на Зеленски, кој рече дека Путин не треба да присуствува. Швајцарија не ја покани Русија.

Москва изјави дека преговорите не се веродостојни без нејзино присуство. Украина и Швајцарија сакаат да присуствуваат руските сојузници, вклучително и Кина.

Како одговор на прашањата за приказната на Ројтерс, портпаролот на американскиот Стејт департмент рече дека секоја мировна иницијатива мора да го почитува „територијалниот интегритет на Украина во нејзините меѓународно признати граници“ и ја опиша Русија како единствена пречка за мирот во Украина.

-Кремљ сè уште не покажа значаен интерес за завршување на војната, напротив – рече портпаролот.