Самоизолацијата може тешко да ја поднесат луѓе кои се соочуваат со внатрешни конфликти, оние кои се емоционално лабилни, а додека пак, многу полесно ќе поминат оние кои имаат добра кондиција и ментално здравје.

-Кога човекот се навикнува на комуникација, тој тежнее да ја има и понатаму таа комуникација. Кога ќе се воведе вонредна состојба, многу луѓе имаат комуникација со апстиненција. Таа апстиненција ќе предизвика паника, чувство на осаменост, зголемена фрустрираност, пад на толеранција, психотичност, изјави за „Утрински брифинг“ на „Слободна ТВ“ психологот Станислав Петковски.

Тој смета дека решението во справување со кризата е во креирање на нови ритуали и пронаоѓање на други навики и рутини, кои се во склад со моменталната ситуација.

-Во оваа ситуација најзагрозен ќе биде начинот на кој се структура времето. Потреба за дружба, односно за комуникација некои луѓе ќе ја компензираат со телефони, социјални мрежи, но начинот на кој се структурира времето ќе бара повлекување во своите мисли и ритуали. Веќе во ритуалите ќе има луѓе кои истите нема да можат да ги спроведат, вели психологот Петковски.