Со победата од 73:62 во СРЦ „Кале“ екипата на МЗТ Скопје Аеродром обезбеди 17 учество во финалето во кое ќе атакува на својот 10 трофеј во историјата. Во вториот натпревар од полуфиналето на плеј-офот во Првата македонска кошаркарска лига, МЗТ беше подобар од својот вечен ривал Работнички за конечни 2:0 во серијата и ќе ја брани шампионската титула против победникот од второто полуфинале ТФТ Mozzart – Пелистер (0-1).

Нервозата на трибините го донесе и првиот прекин на дербито (фрлени безброј хартиени ленти на теренот), по неполни шест минути, кога, резултатски гледано, Работнички поведе со 12:9. Андоноски беше изненадување, макар и делумно, за одбраната на Работнички во првите минути од втората четвртина. Не и Војдан Стојановски по чиј точен обид за три поени, МЗТ Скопје Аеродром поведе со 25:21 во 13 минута.

Нешто повисока беше позитивата за гостинската екипа (32:27), кога положи Кук, а останаа 3:20 минути до истекот на првото полувреме. Капитенот Горјан Марковски ги реализираше следните три напади на „црвено-белите“, доволно за резултатски приклучок, (30:32). Но, следуваа пет поени по ред на „металците“, за највисоката разлика во првото полувреме, (37:30), креирана од Кук и Вер, со дополнение на В. Стојановски. По неговиот 11 поен, „сино-белите“ се одвоија и на 39:32, пред Вер да погоди тројка од осум метри и постави 42:34 на семафорот, пред заминување на голем одмор.

Работничи беше екипата која подобро го отвори и второто полувреме. Направија „црвено-белите“ серија од 7:2 со која за три и пол минут игра се доближија на 41:44. Неполни две минути подоцна, по тројката на Умпиг, Работнички беше екипата која водеше, макар и минимално (46:45), знак за тренерот Атанасов да потроши уште еден тајм-аут.

Многу подобро, особено во одбраната, функционираше Работнички, и за скоро осум минути, екипата од Аеродорм реализираше скромни шест поени. Доволно Работнички да се одвои, макар и на „плус четири“, (52:48). Само до моментот кога Војдан Стојановски погоди нова тројка, да ја врати ситуацијата на теренот кон егал (51:52). Сличен беше резултатот, (54:53), и по 30.минути…Работнички имаше проблеми во реализацијата на шутот, особено за три поени (2/19), МЗТ Скопје пак се мачеше од линијата за слободни фрлања (8/15), но поведе одново, сега со (60:56) по нешто повеќе од три минути игра од последната четвртина.

Бакоч ја прекина серијата од 9:2 на гостинската екипа, но Вер беше прецизен за три поени, и го натера тренерот Димитар Мираковски за кратко време да земе уште една минута одмор. МЗТ Скопје одново имаше солидни 65:58 на 4:54 минути до крајот. Повисоки ги направи Кефи, украде топка и положи за највисоко водство на гостите (67:58).

Но и многу пократко време за Работнички да се врати назад во мечот број 2 од полуфиналето, само 3:12 минути. Период во кој аеродромци направија 16:4 кои сериозно ги доближија кон влезот во големото финале и одбрана на титулата. И успешно се одбранија од последниот обид на ривалот, доволно за пласман во финалната серија. В. Стојановски и Кук реализираа по 18 поени за клубот од Аеродром, а за тимот од Градски парк Малешевиќ застана на бројката од 14 поени, еден помалку запиша Ѓелетовиќ.