Во трезорот на книжарницата и музејот Морган во Њујорк, пронајден е валцер од полскиот композитор Фредерик Шопен, напишан пред речиси 200 години.

Кустосот на музејот Робинсон Меклелан вели дека делото најверојатно е создадено помеѓу 1830 и 1835 година, дека не е потпишано, но дека неговиот препознатлив симбол на бас-клучот го посочува Шопен како автор, пренесува „Би-би-си“.

Откако го открил делото, разговарал со академик од Универзитетот во Пенсилванија кој е експерт за полскиот композитор, а потоа биле тестирани мастилото и хартијата, по што било заклучено дека станува збор за оригинал.

Се вели дека валцерот има мали грешки во ритамот и нотацијата, но МекКлелан е цврсто убеден дека Шопен стои зад делото.

„Она во што сме најсигурни е дека е напишано од раката на Шопен. Она што не е сосема сигурно е дека тоа е музика што тој ја компонирал. Сигурен сум 98 отсто, а многу луѓе кои ја слушнале веќе чувствуваат дека звучи како Шопен. Има нетипични аспекти на музиката, бурниот почеток е малку изненадувачки, но не е целосно надвор од карактерот. А потоа следи мелодија за која се чувствува дека го има квалитетот на Шопен“, изјавил МекКлелан.

Шопен, кој пишувал главно дела за пијано, починал во Франција во 1849 година на 39-годишна возраст, а за време на неговиот релативно краток живот бил прогонуван од халуцинации и се верува дека имал епилепсија.