Во рамките на фестивалот „Арт Ареа“ беше промовиран романот „Естом“ од Николина Андова Шопова. Романот е објавен во едицијата „ПРОаЗА“ на издавачката куќа „Или-Или“ од Скопје.

„Естом“ е втор роман на Шопова, а во својот осврт промоторот Владимир Јанковски напиша:

– „Естом“ е книга во која Николина Андова Шопова продолжува да истражува некои од темите што се карактеристични за нејзиното творештво: необичните човекови судбини, судбините на чудаци што се разликуваат од околината во која живеат, верувањето во ирационалното и неискажливото како важен елемент на човековиот живот, чувството дека човековиот живот се состои од мигови што не можат целосно и до крај да се објаснат.

Таков „чудак“, кој живее според сопствени правила, е и главниот лик во романот „Естом“ – пантомимичарот Олег. Врвен во она што го прави, целосно посветен на својата уметност и умешност, Олег наликува на оние уметници кај кои нивниот уметнички сензибилитет целосно се поклопува со нивниот живот и судбина. Живеејќи според поетиката на отсуството, на невидливото, на силината на световите што самиот ги создава, а се помоќни од каква било „реалност“, тој успева својот живот целосно да го поистовети со својата уметност – напиша Јанковски.

Николина Андова Шопова (1978) дипломира на Катедрата за македонска и јужнословенска книжевност на Филолошкиот факултет „Блаже Конески“ во Скопје. Нејзината прва поетска книга „Влезот е од другата страна“ во издание на издавачката куќа „Темплум“ ја доби наградата „Мостови на Струга“ за најдобра дебитантска книга што ја доделуваат фестивалот „Струшки вечери на поезијата“ и УНЕСКО.

Во 2014 година ја издава втората поетска збирка „Поврзи ги точките“, повторно во издание на „Темплум“. Во 2018 година го издава романот „Некој бил тука“, за кој ја добива наградата „Роман на годината“ што ја доделува Фондацијата за унaпредување и промоција на културните вредности „Славко Јаневски“.

Пишува и раскази, а авторка е и на книгите за деца „Волшебната комета“ и „Кртот Ѕвездан“.

(Текстот е објавен во „Културен печат“ број 146, во печатеното издание на весникот „Слободен печат“ на 17-18 септември 2022)