Благодарение на високите цени на нивните возила, производителите на автомобили ширум светот имаа рекордна продажба во текот на летните месеци и остварија рекорден профит.

Како што открива студијата на консултантската куќа „Ернст и Јанг“, германските концерни ги зазедоа првите позиции во рангирањето на компаниите кои забележаа раст на добивката во третиот квартал.

Во периодот од јуни до септември 2022 година, Фолксваген оствари најголем промет, а Мерцедес- Бенц, најголем профит, објави порталот Каматица.

„Сè на сè, третиот квартал, и покрај економското забавување и многу тешката геополитичка ситуација, беше квартал од соништата за автомобилската индустрија“, вели Константин Гал, раководител на Одделот за мобилност за Западна Европа во Ернст и Јанг.

А што се однесува до вкупната добивка во тековното работење, но и во однос на вкупниот промет на 16-те анализирани компании, ова се најдобрите вредности забележани досега во третиот квартал.

Според консултантската компанија, шеснаесетте најголеми автомобилски концерни во светот го зголемиле прометот во просек за 28 отсто.