Доколку некогаш сте размислувале за преселба во странство, едно ново истражување може да ви даде дополнителна мотивација. Според податоците објавени од организацијата „Вилијам Расел“, Виетнам е прогласен за најевтина земја за живеење за иселеници во 2025 година,.

Студијата ги споредила трошоците за здравствена заштита, транспорт, кирија, храна и комунални услуги во различни земји, а Виетнам се издвоила како земја што нуди најмногу за најмалку пари, пишува „Дејли мејл“.

Зошто Виетнам е најдобриот избор?

Портпаролот на „Вилијам Расел“ објаснува зошто: „Виетнам долго време е омилена дестинација меѓу патниците со ограничен буџет и дигиталните номади, нудејќи сè што ви е потребно за квалитетен живот. Од сончеви плажи до големи градови, добра храна и пријателски домаќини, модерни погодности и древни традиции што сè уште не се откриени – Виетнам е една од ретките земји што навистина може да каже дека има сè.“

Трошоците за живот сигурно ја поткрепуваат таа изјава. Еднособен стан во Виетнам може да се изнајми за само 361 долар (околу 310 евра) месечно, додека стан со три спални соби чини просечно 801 долар (690 евра).

Вкупните трошоци за живот се за 59 проценти пониски отколку во Велика Британија, на пример, а најевтиниот град за живеење е Да Нанг, крајбрежна метропола позната по своите плажи и ноќен живот.

Интересни факти за Виетнам

Со над 3.000 километри крајбрежје – Виетнам се протега по должината на Источното Море и нуди безброј песочни плажи, од популарни како На Транг до скриени заливи на островот Фу Куок. Морето е топло преку целата година, а морската храна е секогаш свежа.

Виетнамците пијат неверојатни количини кафе – Кафето е втор најпопуларен пијалак во земјата (по зелениот чај), а Виетнам е еден од најголемите производители на кафе во светот. Нивното познато ладно кафе со кондензирано млеко е вистинска енергетска бомба и културен симбол.

Улицата е често пожива од ресторанот – Уличната храна е срцето на виетнамската кујна. Фо (супа од говедско месо и тестенини), бун ча (свинско месо со тестенини од вермичели) и бан ми (сендвич со багет со локални додатоци) се само неколку од легендарните специјалитети што буквално можете да ги јадете на пластично столче покрај патот – и тоа многу добро.

Над 50 етнички малцинства – Иако мнозинството од населението се Виетнамци (Кинх), земјата е дом и на над 50 различни етнички групи, од ридските племиња на север до заедниците на камбоџанската граница. Секоја има свој јазик, костими и обичаи.

Мотоциклот е крал на сообраќајот – Во градови како Хо Ши Мин и Ханој, мотоциклите се главно превозно средство – ги има над 50 милиони. Преминувањето на патот може да биде предизвик, но постои едно правило: одете право и не менувајте насока – возачите ќе се прилагодат на вас!

Има едно од најспектакуларните природни чуда – Заливот Ха Лонг – Со повеќе од 1.600 варовнички острови и карпи што се издигаат од морето, Заливот Ха Лонг е место на светското наследство на УНЕСКО и едно од најпознатите места во Југоисточна Азија.

Виетнам има силно чувство за заедница и семејство – Културата се заснова на колективизам. Повеќе генерации често живеат заедно под ист покрив, а почитувањето на постарите и семејните обврски е длабоко вкоренето.

Има многу млада популација – Повеќе од половина од Виетнамците се под 35 години. Ова се рефлектира и во брзиот развој на земјата, особено во технологијата, образованието и стартап културата, особено во големите градови.

Тет (виетнамска Нова Година) е најголемиот празник – се слави во јануари или февруари, во зависност од лунарниот календар. Целата земја застанува – семејствата се собираат, домовите се украсуваат со цвеќиња и фенери, а градовите стануваат шарени и празнични.

Комбинација од Исток и Запад – Поради француското колонијално минато, во Виетнам ќе најдете интересна архитектура, багети, кафе, но и будистички пагоди, конфучијански храмови и традиционални пазари – сите во истата населба.

Други поволни земји за иселениците

Боливија се најде на второто место. Во главниот град, Ла Паз, стан со една спална соба чини во просек 386 долари (332 евра), а стан со три спални соби чини 707 долари (609 евра).

„Боливија нуди мешавина од авантуристички дух и модерен комфор. Градови како Ла Паз, Кочабамба и Санта Круз де ла Сиера се сместени во средината на прекрасни планини и бујни џунгли. Животот во Боливија им овозможува на иселениците да уживаат во луксуз за само неколку долари на ден“, според „Вилијам Расел“.

Третото место го освои Грузија, земја што експертите ја опишуваат како „модерно општество без високи цени“. Иако главниот град Тбилиси е сè повеќе поврзан со Европа благодарение на новите директни летови, најевтиниот град за живеење во Грузија е Кутаиси, третиот по големина град во земјата, познат по својата близина до природата и пријатната урбана средина. Мал стан во центарот на Кутаиси може да се изнајми за 550 долари (447 евра) месечно.

Индија е на четвртото место, каде што може да се изнајми стан со три спални соби за просечно 433 долари (373 евра) месечно.

„Во Индија, вашиот буџет ќе се прошири многу повеќе, овозможувајќи ви да живеете луксузен животен стил – дури и во еден од нејзините мегаградови“, рече портпаролот од организацијата.

Но, тој исто така истакнува дека животот во Индија не е за секого: „Индискиот начин на живот бара време за навикнување, па можеби нема да биде лесен за оние со слабо срце“.

Камбоџа е на петтото место како најприфатлива земја за иселеници. Стан со една спална соба во центарот на градот чини просечно 405 долари (349 евра) месечно.  Најевтиното место за живеење во Камбоџа е главниот град, Пном Пен.